Tá Parlaimint na hAlban tar éis bille nua a rith a thugann stádas oifigiúil don Ghàidhlig agus an Albainis.

Vótáil na feisirí parlaiminte d’aon ghuth ar son Bhille Teangacha na hAlban, a dhéanfaidh athruithe tábhachtacha ar an tacaíocht a bheidh ar fáil do na teangacha seo sa chóras oideachais.

Dar le rialtas na hAlban, cuideoidh an bille seo le hiarrachtaí an dá theanga a fhorbairt.

Fógraí dátheangacha i nGàidhlig agus Béarla

Dúirt an Leas-Phríomhaire, Kate Forbes, go raibh “muinín” aici go gcabhróidh an reachtaíocht le hiarrachtaí an rialtais líon na gcainteoirí a mhéadú.

Luaigh sí go neartóidh an bille na cearta atá tuismitheoirí scoil lán-Ghàidhlig a aimsiú ina gceantar féin, agus go gcuirfear spriocanna agus cáilíochtaí nua ar fáil don teanga.

Mar chuid den reachtaíocht nua, beidh sé indéanta freisin “ceantair thábhachtacha teanga” a chruthú in áiteanna ina mbíonn an Ghàidhlig fós á labhairt mar theanga phobail – cosúil leis na ceantair Ghaeltachta in Éirinn.

Deir an rialtas go gcabhróidh sé leo maoiniú agus tacaíocht a dhíriú ar na réigiúin is leochailí ó thaobh na teanga de.

Tá £5.7 milliún breise á chur ar fáil i mbliana chun an Ghàidhlig agus an Albainis a chur chun cinn.

Léirigh Daonáireamh 2022 go raibh scileanna Gàidhlig ag 130,161 duine – méadú de bheagnach 43,000 ó 2011.

Bhí scileanna Albainise ag 2.4 milliún duine, méadú suntasach ó 2011 freisin.

Mar sin féin, rinne Páirtí an Lucht Oibre cáineadh ar an mbille. Dúirt a n-urlabhraí airgeadais, Michael Marra, nach bhfuil an bille “sách maith” agus ní éireoidh leis an Ghàidhlig a chosaint.

Urlabhraí airgeadais Pháirtí an Lucht Oibre, Michael Marra

Dúirt sé nach mbeidh dul chun cinn fíor ann gan forbairt eacnamaíoch sna ceantair Gàidhlig.

Tá an bhliain seo ag comóradh 20 bliain ó ritheadh Acht na Gàidhlig (Albain) 2005 — céim mhór ag an am, agus anois céim eile chun teangacha dúchasacha na hAlban a neartú.